CONCERTO | “Vinde todas” (Carme López)

A Capela de Santa María, en Lugo, acollerá o venres 29 de novembro -ás 20.00 horas – o concerto de presentación do primeiro disco de Carmela, o proxecto musical da intérprete e investigadora da música de tradición oral Carme López, editado este mes de novembro co título “Vinde todas”

A intérprete do Incio estrea o disco, cun repertorio baseado na recollida de música de tradición oral galega e peninsular a través de procesos de campo directos e en arquivos públicos e privados, acompañado por artistas convidadas: Begoña Riobó, Laura Lamontagne, a Escola de Baile de Cantigas e Flores e as Pandereteiras de Toutón.

A actuación inclúese dentro da programación que a Vicepresidencia da Deputación de Lugo impulsa na Capela de Santa María, para impulsar o uso cultural e artístico deste espazo ligado ao Centro de Artesanía e Deseño.

Carmela

Carmela é un proxecto musical que basea o seu repertorio na música de tradición oral galega, a través do canto e a percusión de man como elementos definitorios.

Iniciando o traballo dende informantes e arquivos musicais, o obxectivo do proxecto é trasladar aos palcos a esencia destas melodías acompañadas dunha visión propia e actual, empregando non só criterios estéticos, senón outros vinculados coa análise musical e de contexto da música coa que se traballa, un achegamento que suma a investigación etnomusicolóxica coa interpretación e arranxo musical.

Carmela utiliza a tradición como un ente flexible e moldeable que se adapta ao contexto musical actual a través de sons que viaxan dende as percusions ata referencias electrónicas. Un proxecto diferente no seu discurso tanto musical coma extramusical que posiciona a tradición oral e a perspectiva de xénero no centro.

Vinde Todas

O disco “Vinde todas” reflexiona sobre a necesidade de visibilización das informantes a través da propia música e outros conceptos que a abrazan. O inicio e peche do disco recollen as conversas e cantos en Moscoso e Toutón, respectivamente, reflexo da importancia do discurso
para comprender a música.

Cada unha das cancións do disco leva como título principal o nome da ou das mulleres a través das que se coñeceu a melodía arranxada. Entre as colaboracións do disco destacan a das Pandereteiras de Toutón (informantes en activo) e as Titiriteiras da ACF Tarambainas (mostra da
interxeneracionalidade da música de tradición oral galega).
Tamén se mestura o arranxo e interpetación musical coa investigación e análise etnomusicolóxica, escollendo timbres e harmonías a través da comprensión dos usos e funcións primixéneos da melodía.