FIM MOAÑA

FIM 2025 | MOAÑA

O FIM · Festival Intercéltico do Morrazo chega este ano á súa 41ª edición. Organizado polo Concello de Moaña, terá lugar do 23 ao 27 de xullo de 2025. Un festival onde o público poderá gozar dos concertos e das actividades paralelas sen restricións de acceso e de balde. O cartel de concertos do 41 FIM celebrará a nosa música cun total de catro actuacións con representación irlandesa, escocesa e galega.
VENRES 25 · 22.00h
Ailá emerxe das máxicas foliadas na Casa das Crechas. Unha proposta inspirada no respecto á tradición e á música patrimonial galega, pero cunha visión sen fronteiras, mesturada con aromas, ritmos e cores doutros lugares e doutras culturas, aberta ao mundo sen complexos e, sobre todo, coa ilusión e curiosidade de todo aquel que ama o que fai. Ailá é un dos representantes máis novos do trad, un xénero que excede ao musical no que a danza e a música pasan a converterse nun xeito de entender a vida, un xeito de estar no mundo.
En 2019, Dervish recibiu o prestixioso premio á traxectoria da BBC, unha homenaxe apropiada á banda despois de máis de 30 anos de gravación e actuacións en todo o mundo. Descrita pola BBC como "unha icona da música irlandesa", a banda tocou en festivais desde Río de Janeiro ata Glastonbury. Os dervishes teñen unha aliñación que inclúe a algúns dos mellores músicos tradicionais de Irlanda, encabezados por unha das cantantes máis coñecidas do país, Cathy Jordan. Establecidos como un dos nomes máis importantes da música irlandesa a nivel internacional, son recoñecidos polas súas actuacións en vivo, que combinan brillantes conxuntos de melodías con impresionantes interpretacións de cancións tradicionais. Os seus álbums de estudo e ao vivo forman un dos catálogos máis destacados da música irlandesa.
SÁBADO 26 · 22.00h
Ross Ainslie & Tim Edey son dous dos músicos máis destacados da música tradicional escocesa e celta contemporánea. Ross Ainslie, nacido en 1983 en Perthshire, Escocia, é un virtuoso da gaita, frauta e cistro, coñecido polo seu innovador enfoque da música tradicional escocesa. Colaborou con artistas como Kate Rusby e Dougie Maclean, ademais de formar parte de bandas como Treacherous Orchestra e Salsa Celtica. Tim Edey, orixinario de Broadstairs, Kent, é un experto en guitarra e melodeón, e traballou con artistas como The Chieftains, Sharon Shannon e Natalie MacMaster.
Sabela Maneiro, Aida Tarrío e Olaia Maneiro son TANXUGUEIRAS, e volven a Moaña para pechar ao grande o 41 FIM. Só elas son capaces de reinterpretar os sons dunha tradición milenaria fusionándoa con ritmos urbanos e electrónicos. A súa enerxía, o seu empoderamento, a súa contundencia e o seu virtuosismo vocal son os máximos expoñentes do seu innovador estilo, coñecido como trad. O trío recolle o legado das pandeireteiras, as mulleres que traballaron por manter viva a música tradicional galega, para revisionalo e lanzarllo de novo ao mundo nunha explosión de modernidade, contando cun estilo épico e unha forza ancestral que xa as fixo triunfar en escenarios de varios países.
A MOA
Complementando os concertos do FIM, do 23 ao 27 de xullo chega a cuarta edición de A MOA, a Mostra de Artesanía e Cultura Tradicional, con cartel propio que contará con presentacións, expositores, obradoiros, desfiles e actuacións de música e danza tradicional, organizada pola Asociación MOAÑA Antiqua e o Concello de Moaña.